كأس العالم ٢٠١٨ سانت بيترسبرغ

كأس العالم ٢٠١٨ سانت بيترسبرغ

سانت بيترسبرغ

هي اكتر مدينة اوروبية روسية معروفة، وهي واحدة من أجمل المدن الروسية بحضارة وتاريخ عظيم، فـ سهل جدا تلاقي ع الأقل حاجة واحدة تعجبك فيها وتحس انها موجودة عشانك. سانت بيتر سبرغ اتأسست على ايد بيتر الأول سنة 1703 ومعروفة بـ العظيم بيتر والملكة ايكاترينا وبيسموها بـ “Peeter”.

مدينة بيترسبرغ أمان، بس برضه ماتمشيش لوحدك بالليل. بس لظروف كاس العالم وعشان النشالين موجودين في كل مكان، خلي بالك كويس جدا. يعني مثلا: خبي الباسبور بتاعك وامشي بس بنسخة منه.

العملة:

العملة الرسمية هي الروبل الروسي

واحد دولار= 62 روبل “ودي بالمناسبة تمن تذكرة مترو”

100 جنية مصري = 350 روبل

  • أماكن تغيير العملة في سانت بيترسبرغ موجودة في كل مكان واسمها “بيروس”، وأسعارهم كويسة جدا بعد البنوك وبعدهم الفنادق. بس لو غيرت من البنك هتكون محتاج باسبورك أو صورة منه. وبالنسبة لتعاملك الشخصي بالفلوس، معظم الأماكن بتقبل فيزا وماستر كارد، بس نصيحة مني في المعاملات الصغيرة لو تدفع كاش يكون أحسن. لأن في أماكن زي القطارات هناك مش بتقبل كريديت كارد، وماكينات الـ ATM فيها بتكون مفيهاش فلوس كاش، فلازم يكون معاك فلوس عشان تقدر تشتري تذكرة.

 الميزانية لشخص واحد:

متوسط سعر الوجبة للفرد الواحد بتكون حوالي 600 روبل، يعني تقريبا 10 دولار أمريكي و171 جنية مصري.

المواصلات العامة زي تذكرة مترو للرحلة الواحدة هيكلفك 45 روبل يعني 0.7 دولار و13 جنية مصري.

وتذكرة دخول متحف مابين 400 لـ 700 روبل، يعني 12 دولار و200 جنيه مصري

القهوة 210 روبل

الغدا في مطعم اقتصادي = 250 روبل

والعشا في مطعم حلو = 1200 روبل

ومركب نهري بين حوالي 600 و 800 روبل

ازاي تروح لوسط المدينة من وإلى المطار:

في سانت بيتر سبرغ انت ممكن تروح أي مكان بالمواصلات العامة من وإلى المطار، في المدينة وعلى أطرافها.

سانت بيتر سبرغ فيها مطار واحد بس اسمه Pulkovo، ويبعد عن المطار حوالي 23 كيلو متر.

وعشان تروح من أو إلى المطار لوسط المدينة، عندك كام طريقة:

  • الأتوبيس

كل يوم من 5:30 الصبح لـ 1:30 صبح تاني يوم، بتقوم الأتوبيسات بـ 12 رحلة كل 12 لـ 20 دقيقة، والرحلة المفروض بتاخد 35 دقيقة، أما تكلفتها فبيكون 40 روبل.

  • الأتوبيس السريع

وده بيوصلك برضه من المطار لمحطة مترو اسمها  “Moskovskaya” كل 30 دقيقة.الرحلة بتاخد حوالي 20 دقيقة لو الطريق ماشي كويس، وتذكرته تكلفتها 40 روبل.

  • عربية أجرة صغيرة

شبه التاكسي، أو زي مابيقولوا عليه “marshrutka”، وده هيوديك نفس محطة المترو بنفس السعر لكن هيكون أسرع، يعني هياخد حوالي 15 دقيقة بس “في حالة عدم وجود زحمة”.

  • التاكسي

وده هيكلفك حوالي 700 روبل، لو هتاخد أوبر أو أي ابليكيشن مماثل زي Yandex Taxi أو Get Taxi. أو بقى تاخد تاكسي من محطته، ساعتها هتدفع ضعف المبلغ

 الانتقالات داخل المدينة: 

سانت بيترسبرغ فيها مواصلات عامة ممتازة، زي المترو والأتوبيسات والأتوبيسات الصغيرة اللي اتكلمنا عنها فوق. علامات المترو كلها بالأنجلش وليه أبليكيشن ممن تحمله أول ماتوصل ,عشان الموضوع يكون أسهل عليك.

Metro St Petersburg

SIM CARD

أول ما توصل، حاول تشتري رقم محلي، لأن المدينة بتوفر واي فاي عام عشان تخلي حياة الناس، خصوصا اللي جايين كاس العالم، أسهل. ده غير ان الواي فاي المحلي اللي بينزل مع الرقم المحلي أرخص كتير وكده كده هتحتاج الرقم في طلب تاكسي أو أوردر أكل الخ ..، وأرخص خط هيكلفك حوالي 900 روبل يعني 256 جنيه مصري، والخط عليه 5 جيجا بايت انترنت و1100 دقيقة.

المناخ في سانت بيتر سبرغ:

الصيف هو أحسن موسم لزيارة سانت بيترسبرغ، عشان تجرب الوايت نايتس أو الأيام الطويلة المشهورة هناك، هتحس إن المدينة دي مش بتنام خالص. درجة الحرارة في يونيو بتكون ما بين 15 لـ 24 درجة، مع أمطار قليلة.

كلمات بالروسي ممكن تحفظهم ويساعدوك:

Good Morning/Good Afternoon – DobrojeUtro /Dobri Den
Please – Pozhalujsta
Thank you – Spasibo
Goodbye – Do svidanija
Sorry, Excuse me – Izvinite
Where is – Gde
Where is the subway? – Gde metro?
I am lost – Yazabludilsja
1 Coffee, please – Odin kofe, pozhalujsta

الأكل:

أكلات روسية لازم تجربوها:  

  • Pirogi (Пироги)

ده فطير محشو لحمة أو أي حاجه

  • Pelmeni

نوع من أنواع الزلابيه أو الفطيرة  المحشوة

  • Russian salad (Оливье)

سلطة بطاطس مع مايونيز كتيرر

  • Blini (Блины)

نوع من أنواع الكريب، ممكن نسمية البان كيك الروسي، وده ممكن تاكله كتحلية

  • Golubtsy (Голубцы)

وده عبارة عن اوراق كرنب ملفوفة مع لحمة مفرومة.

  • Plov (Плов)

دي بقى أكلة اوزبكية، وهي عبارة عن رز مع أي حاجه.

  • Solyanka (Солянка)

شوربة حامضة وسبايسي

  • Borsch (Борщ)

شوربة شمندر يقال ان أصلها جاي من اوكرانيا

  • Beef Stroganoff (Бефстроганов) 

أكلات رخيصة: 

Teremok

أكل روسي سريع عبارة عن بان كيك محشو جميع أنواع الحشوات، وبيكلف حوالي 150 روبل

PirogovyDvorik

ودي أكله تانية رخيصة وبتغطي كل أنواع الفطائر الروسي

Stolovaya

سلسلة مطاعم بتقدم أكل يناسب الميزانيات القليلة وديما زحمه  

الأكل متوسط الميزانية:

Moomoo Burger

وده لازم تجربوه، لذيذ جدا وتكلفته حوالي 500 روبل

Khachapuri 

مطعم بيقدم أكل من جورجيا لازم تجربوة، تقييمه عالي جدا

B&B Burgers

وده مطعم ليه 12 فرع في موسكو، مكان رائع تاني للبرجر لازم تجربوه هو كمان

 
LepimiVarim

ده مطعم بيقدم أكل روسي وأكل من جورجيا كمان

الأكل عالي الميزانية:

وده بيكون في مطاعم زي:

Kokoko وتكلفة الوجبة فيه حوالي 1500 روبل

وممكن تنزلوا TripAdvisor offline guide لسانت بيترسبرغ وتشوفوا باقي المطاعم هناك 

الحياة الليلة:

من أشهر شوارع سانت بيترسبرغ شارع أسمه Rubinshteina street

هتلاقوا فيه بارات كتير حلوة جدا

وبرشحلكم زيارة البارات دي كمان

  • Gastronomika
  • 812

أماكن ممكن تزورها سياحة في سانت بيترسبرغ:

  1. Peter and Paul’s fortress
  2. Winter PalaceWinter Palace
  3. St Isaac’s Cathedral
  4. The Bronze Horseman
  5. Church of the Savior on Blood
  6. Kazan Cathedral
  7. NevskyProspecy (avenu)
  8. MariinskyTheather
  9. Trinity Cathedral
  10. St Petersburg Mosque

حاجات ممكن تعملها هناك: 

  • تاخد مركب في النهر تشوف من خلالها مناظر ماشوفتهاش في المدينة، خصوصا انها شبه أمستردام في تكوينها على قنوات مائية.
  • تشوف الكباري اللي بتتفتح بالليل والمراكب اللي بتعدي من الفتحات دي في حدود 1 باليل.

نصيحة:حاول تتأكد وانت بتتفرج على الكباري وهي بتفتح إنك في الجانب اللي ممكن تروح منه بسهولة للأوتيل بتاعك، لأن لو الكوبري فتح وانت في المكان الغلط هتضطر تستنى لـ 3 الصبح لما الكباري تقفل من جديد.  

  • في رحلات نهرية منتصف الليل بتفضل حوالي ساعتين في الماية تتفرج على كل الكباري اللي بتفتح واحد واحد، وتكلفة التذكرة الواحدة بتكون 17 دولار للفرد، وماتنساش تتمنى أمنية وانت بترمى عملة معدنية.

أخر حاجه:

أكتشاف المدينة على رجلك احساس أحلى بكتير، فحاول ماتنساش خريطتك في ايديك واتبسط، لأن دي الطريقة الوحيدة اللي هتشوف بيها جمال المكان الحقيقي.

اكت

لو رايحين موسكو اقرو المقالة دي

Follow:

Leave a Reply

This site uses Akismet to reduce spam. Learn how your comment data is processed.